RAUÐVÍNSTÁR ÚR ADRÍAHAFINU

Gráttu Lacrima, gráttu!

Við höfum flutt inn vín frá Umani Ronchi frá upphafi, m.a. hvítvínið vinsæla Casal di Serra sem fæst hér enn. Vinalegt vínfyrirtæki við Adríahafið sem okkur þykir orðið vænt um eftir gott samstarf.

Umani Ronchi er einn þekktasti fulltrúi Le Marche héraðsins og flaggberi svokallaðra staðbundinna þrúgna sem eru þrúgur sem hafa vaxið og dafnað á svæðinu í gegnum aldirnar frekar en innfluttar tískuþrúgur.

Án efa er sérstæðasta þrúgan í þessum hópi sú sem kallast Lacrima og kennd við bæinn Morro d'Alba af agnarlitlu vínræktarsvæði við Adríahafsströndina.

Nafnið Lacrima þýðir á íslensku "tár" vegna þess að síðsumars þegar hún er orðin þroskuð grætur hún votri dögg á yfirborð sitt - en líka hugsanlega vegna perlulaga lögunnar berjanna.

Þétt, þurrt en aldrei væmið

En það er ekki nafnið sem slær mann þótt skemmtilegt sé heldur karakter vínsins. Ilmurinn er engu líkur, heillandi og óvenjulegur fyrir rauðvín, rýkur úr glasinu með angan af blómahafi og dökkum berjum.

Í munni stígur vínið hins vegar fæti aftur til jarðar; all þétt og þurrt en aldrei væmið þrátt fyrir lokkandi ilminn.

Þetta jafnvægi gerir það að verkum að það er skemmtilegt matarvín ekki síst með feitum kjötréttum eða jafnvel óvenjulegri samsetningum eins og fiski og ýmis konar kryddaðri matargerð.

Lacrima di Morro d'Alba "Fonte del Re" 2007 frá kostar 2.790 kr. og fæst í Heiðrúnu, Kringlunni, Skútuvogi og Borgartúni.

Kíktu á Vín og mat á Facebook »