NÝTT HVÍTVÍN

Gula múskatið

Fáar þrúgur hafa eins einkennandi og auðþekkjanlegan ilm og sú sem er kölluð Moscato á Ítalíu en þar er hún notuð m.a. til að búa til Asti freyðivín.

Múskat vikunnar kemur hins vegar frá Austurríki og hefur gulleitan blæ eins og nafn þess Gelber Muskateller gefur til kynna.

Hubert Sandhofer er höfundur vínsins og er það dæmigert fyrir hans hreina hússtíl þar sem einkenni þrúgunnar nýtur sín til hins ítrasta.

Í munni er vínið allt mjög áferðarfallegt og milt með þægilega fyllingu en það springur út í nefinu með miklum blómailmi, melónu- og apríkósutónum og frísklegum sítrus á bak við tjöldin til að halda uppi fjörinu.

Hubert Sandhofer Gelber Muskateller 2008 kostar 2.390 kr. í Vínbúðunum Heiðrúnu, Skútuvogi og Kringlunni.

Gula múskatið tekur á móti gestum í Frú Laugu á föstudaginn kl. 16.00.